राप्तीसोनारी (बाँके) : नेपाली काँग्रेसको १४औं महाधिवेशन अन्तरगत आइतबार भएको वडा अधिबेशनको निर्वाचनमा पालिकाका जनप्रतिनिधिदेखि उम्मेदवार घोषणा गरेका व्यक्ति नै वडा तहबाटै पराजित भएका छन ।
काँग्रेसको निर्वाचन समिति बाँकेले दिएको जानकारी अनुसार बाँके निर्वाचन क्षेत्र नम्वर १ को क्षेत्रीय सभापतिका सशक्त दाबेदारी गरेका डिल्ली गिरी वडा मै पराजित भएका छन । उनी बाहालवाला क्षेत्रीय समितिको सचिव थिए साथै उनी संस्थापन ईतरका बलियो उम्मेदवार मानिएका थिए । उनी वडा नं.२ बाट पराजित भएका हुन । सो वडाबाट पार्टीका जिल्ला सचिव तप्त पौडेल र जिल्ला सदस्य पवन शाहसहित १९ जना निर्वाचित हुँदा गिरी १९ जनाभित्र पर्न सकेनन ।
यसैगरी राप्तीसोनारी गाउँपालिकाकी उपप्रमुख समेत रहेकी धनीकुमारी खत्री पनि वडामै पराजित भएकी छिन् । उपप्रमुख खत्री संस्थापन समूहकी हुन् । बाँकेमा वडामै पराजित हुने जनप्रतिनिधिमा खत्री पहिलो हुन् । यसअघि संस्थापन इतरमा रहेकी उपप्रमुख खत्री केही समयअघि संस्थापन समूहमा गएकी हुन् ।
उपप्रमुख खत्रीले वडा नम्बर ८ बाट क्षेत्रीय प्रतिनिधि पदमा उम्मेदवारी दिएकी थिइन् । राप्तीसोनारी गाउँपालिका वडा नम्बर ८ मा संस्थापन इतर समूहले वडा कार्यसमितिसहित क्षेत्रीय प्रतिनिधिमा पुरै प्यानल कब्जा गर्दा उपप्रमुख खत्री वडामै पराजित भएकी हुन् ।
