नेपालगञ्ज : बैंकको लापरबाहीले जाजरकोटको भेरी नगरपालिकाका ९ सय २० बालबालिकाले एक वर्षको पोषण भत्ता गुमेको छ ।
एनआइसी एसिया बैंकले सम्झौता अनुसार काम नगर्दा भत्ता गुमेको नगरपालिकाका पदाधिकारीले बताएका छन् । सरकारले पाँच वर्षमुनिका बालबालिकालाई दिँदै आएको पोषण भत्ता बापतको रकम ४७ लाख रूपैयाँ एनआइसी एसिया बैंकमा गत असार २८ गते नगरपालिकाले जम्मा गरेको नगरप्रमुख चन्द्रप्रकास घर्तीले बताए ।
आर्थिक वर्षको अन्त्यमा काटेको चेक १५ दिनभित्र नसाटे चेक स्वतः रद्द हुन्छ । अन्तिम म्याद साउन १२ गतेसम्म थियो । तर, म्यादसम्म पनि बैंकले काम नगरेकाले रकम फ्रिज भएको नगरप्रमुख घर्तीले बताए ।
