कोरोना संक्रमित बृद्धिपछिको अवस्थाका कारण
नेपालगञ्ज : पछिल्लो समय कोरोना संक्रमितको संख्या अत्याधिक बृद्धि भएपछि बाँकेमा कोरोना सक्रमित बिरामीलाई उपचारका लागि भर्ना गर्न कोभिड अस्पतालमा बेड अभाव भएको छ ।
अस्वाभाविकरूपमा कोरोना सक्रमण फैलिएपछि नेपालगञ्जस्थित भेरी अस्पताल र कोहलपुरस्थित शिक्षण अस्पताल कोरोना संक्रमणका गम्भीर प्रकृतिका बिरामीले भरिभराउ भएको हो ।
भेरी अस्पतालमा कोभिडको विरामीका लागि तयार पारेको बेड एउटा पनि खाली नरहेको अस्पतालका प्रमुख मेडिकल सुपरिटेन्डेन्ट डा प्रकाशबहादुर थापाले जानकारी दिए ।
भेरी अस्पतालले कोरोना सक्रमित बिरामी उपचारका लागि तयार गरिएको कोभिड वार्डका सबै १४२ बेड भरिएको उनले बताउदै अब भने बिकल्प सोच्ने बेला आएको बताए ।
डा. थापाले अहिले पनि गम्भीर प्रकृतिका बिरामी आउने क्रम नरोकिएकाले आउँदा दिन अझै भयावह हुने सम्भावना बढेको बताउदै विकल्पको लागि पहलगर्नु पर्ने कुरामा उनको जोड छ । उनले संक्रमितको संख्या बढेसंगै बिकल्प र जनशक्ति थप गर्नको लागि लामोसमयदेखि संबन्धित निकायको ध्यानाकर्षण गराउदै आएको बताए ।
