दाङ : दाङको देउखुरीस्थित राप्ती नदीमा एक महिलाको शव फेला परेको छ । राप्ती गाउँपालिका वडा नं. २ को राप्ती नदीको कटाहाघाटमा अन्दाजी ४० बर्षीया महिलाको शव फेला परेको हो ।
बुधवार बिहान ८ बजे स्थानीय गाउँलेहरू राप्ती नदी किनारमा दाउरा बटुल्न गएका बेला नदी किनारमा तैरिरहेको अवस्थामा शव देखेपछि प्रहरीलाई खबर गरेका थिए । हरियो ब्लाउज, निलो रंगको पेटिकोटको इजारा र निधारमा समान्य चोट लागेको मंगोलियन तथा पहाडिमुलको जस्तो देखिने शव फेला परेको इलाका प्रहरी कार्यालय भालुवाङका प्रहरी प्रमुख गंगाबहादुर सारूले जानकारी दिए ।
शवबारे अनुसन्धान भईरहेको प्रहरी निरीक्षक सारूले बताए । शवको अहिले सम्म सनाखत हुन नसकेको राप्ती गाउँपालिका वडा नं. २ का अध्यक्ष जगतबहादुर थापाले जानकारी दिए । शवलाई लमही अस्पतालको शव गृहमा राखिएको प्रहरीले बताएको छ ।
