सदरलाइनडटकम,
नेपालगञ्ज : नेपालगञ्ज उप–महानगरपालिका वडानम्बर १८ ले दुई ठाउमा हाईमास्ट जडान गर्न सुरु गरेको छ । वडाको विकास बजेटबाट खर्चने गरी कारकाँदो चोक र एसके पेट्रोलपम्प अगाडीको चोकमा दुई वटा हाइमास्ट जडान गर्न थालिएको सो वडाका वडा अध्यक्ष दीपक बर्माले जानकारी दिए ।
उनले दुई स्थानमा जडान गर्न लागिएको हाईमास्टको लागि १६ लाख खर्च हुने भएको बताए । दुबै ठाउँमा हाइमास्ट जडानको लागि आवश्यक प्रकृया आईतबारदेखि शुरु गरेको उनले जानकारी दिए । ‘हाइमास्ट बनेर तयारी अवस्थामा छ । अबको एक महिनाभित्र यी दुबै क्षेत्रमा हाइमास्टको उज्यालो हुने छ’– उनले भने ।
यसअघि नेपालगञ्ज उपमहानगरपालिकाले नगरको विभिन्न ९ स्थानमा हाईमास्ट जडान गर्न फाउण्डेसन निर्माण समेत गरि सके पनि सो गत वर्षदेखि नै अलपत्र अवस्थामा छाडिएको छ । नेपालगञ्ज उपमहानगरपालिकाको लगानीमा विपी चोकमा यसअघि एउटा हाइमास्ट जडान गरिएको छ ।
