सदरलाइन / लक्ष्मी तिमिल्सेना,
नेपालगञ्ज : संक्रमणकालिन न्याय, मेलमिलाप तथा द्वन्द्व समाधानका लागि जिल्ला सञ्जाल बाँकेको बैठक नेपालगञ्जमा सम्पन्न भएको छ ।
शुक्रबार बसेको सो बैठकले विभिन्न कार्यक्रमको घोषणासमेत गरेको छ । पीडितलाई उनीहरुको आर्थिक सशक्तिकरणका कार्यक्रम, घाइतेहरुलाई स्वास्थ उपचार लागि आर्थिक सहयोग र द्वन्द्व पीडितहरुको समस्या समाधानका निमित्त सरोकारवालाहरुसंग छलफल गर्ने कार्यक्रमहरु सो बैठकले घोषणा गरेको हो ।
द्वन्द्व पीडितहरुलाई आर्थिक उपार्जनका कार्यक्रमहरुबाट स्वोरोजगार बनाउनका लागि उनीहरुको आर्थिक सशक्तिकरणका कार्यक्रमहरु ल्याईएको सञ्जालका जिल्ला संयोजक चन्द्रकला उप्रेतीले जानकारी दिएकी छन् । यस्ता कार्यक्रहरुले उनीहरुको जिविकोपार्जनमा सहयोग पुग्ने अपेक्षा उनले गरिन् ।
संक्रमणकालीन न्याय प्रकृयालाई सहयोग पुर्याउने लक्ष्यले गठन गरिएको उक्त सञ्जालले द्वन्द्व पीडितहरुको न्यायमा पहुँच बढाउने, द्वन्द्व पीडितहरुको सशक्तिकरण गर्ने, उनिहरुका आवश्यकताहरुलाई संबोधन गर्न स्थानीय सरकार तथा वडा कार्यालयहरुसंग समन्वय अनि पैरवि गर्ने र सेवा प्रदायक निकाय सम्म पीडितको पहँच बढाउने र पैरवी गर्ने उद्देश्य लिएको छ ।
