सदरलाइनडटकम,
नेपालगञ्ज : नेपालगञ्ज उपमहानगरपालिका वडा नम्बर ६ फुल्टेक्रामा शनिवार आयोजित निःशुल्क स्वास्थ्य शिविरमा ५ सय ६९ जना सर्वसाधारण लाभान्वित भएका छन् । ग्रामीण आर्थिक सामाजिक उत्थान केन्द्र र मानव अधिकार अनुगमन नेपाल, बाँकेको संयुक्त आयोजना तथा वडा नं. ६ कार्यालयको सहकार्यमा शिविर आयोजना गरिएको थियो ।
ग्रामीण आर्थिक सामाजिक उत्थान केन्द्र बाँकेकी अध्यक्ष लता शर्माका अनुसार विहान ८ देखि दिउँसो ३ बजेसम्म सञ्चालित शिविरबाट २ सय महिला र १ सय ३३ पुरुष गरी ३ सय ३३ जनालाई स्वास्थ्य परीक्षणका साथै निःशुल्क औषधि वितरण गरिएको थियो ।
शिविरमा नेपालगञ्ज मेडिकल कलेजका बाल रोग विशेषज्ञ डा. अनुप सिंह महरोत्रा, भेरी अञ्चल अस्पतालकी मेडिकल अफिसर डा. अस्मिता गौतम र नेपालगञ्ज मेडिकल कलेजका अफिसर दीपक जायसवालले स्वास्थ्य सेवा दिएका थिए । स्थानीय सिद्धार्थ निकेतन विद्या मन्दिर परिसरमा सञ्चालित शिविरमा १३ महिनाको बालबालिकादेखि ८५ वर्षीय वृद्धावृद्धाको स्वास्थ्य परीक्षण गरिएको थियो ।
शिविरमा स्वास्थ्यकर्मी राजेन्द्र वर्मा, स्मारिका श्रेष्ठ र सिमरन श्रेष्ठ एवं आयोजक संस्थाका उपाध्यक्ष तारा केसी, कोषाध्यक्ष ममता आचार्य, नितेश गिरी, रमणकुमार आचार्य, निखिल जायसवाल लगायतले सहयोग गरेका थिए । वडा नम्बर ६ का अध्यक्ष समीर प्रताप सिंहले आयोजक संस्था र चिकित्सकहरुलाई शिविर सञ्चालन गरेर स्थानीयलाई सेवा दिएकोमा आभार व्यक्त गरे ।
