सुर्खेत : कर्णालीका मुख्यमन्त्री यामलाल कँडेलले विश्वासको मत पाएका छन । आज बसेको प्रदेशसभा बैठकमा मुख्यमन्त्री कँडेललाई तीन दलका २३ सांसदले मत दिएका हुन् ।
मुख्यमन्त्री कँडेलले संविधानको धारा १६८ को उपधारा ४ बमोजिम विश्वासको मत पाऊँ भनेर प्रदेशसभा समक्ष प्रस्ताव पेस गरेका थिए ।
४० सदस्यीय प्रदेशसभामा कांग्रेसका तीन जना सांसद अनुपस्थित भएका थिए । एक जना निलम्बनमा परेका र दुई जना अनुपस्थित थिए । सभामुखसहित ३८ मध्ये मतदानमा ३५ जना सदस्य सहभागी भएका थिए ।
सहभागी मध्ये मुख्यमन्त्री कँडेलको पक्षमा २३ र विपक्षमा १२ र एक सांसद तटस्थ बसे । एमाले संसदीय दलका नेता समेत रहेका कँडेललाई एमालेका ९, माओवादीका १३ र एकीकृत समाजवादीका एक सांसदले मत दिएका हुन् ।
कांग्रेसका १५ जना सांसदमध्ये संसदीय दलका नेता जीवनबहादुर शाही निलम्बनमा छन् भने सांसद राजीव विक्रम शाह र जानकी सिंह संसद्मा उपस्थित भएनन् ।
कांग्रेसका १३ जना सांसदले विपक्षमा मतदान गरे भने भने राप्रपाकी सांसद सन्तोषी शाहीले पार्टीको नीति अनुरुप मतदानमा सहभागी नहुने बताउँदै मतदानमा सहभागी भईनन ।
कांग्रेस संसदीय दलका नेता जीवनबहादुर शाही निलम्बनमा परेसँगै प्रदेश सभा सदस्यहरूको सङ्ख्या सभामुखसहित ३९ रहेको छ । ४० सदस्यीय प्रदेश सभामा सरकार बनाउनका लागि कम्तीमा २१ सिट आवश्यक पर्छ ।
विश्वासको मत पाएपछि मुख्यमन्त्री कँडेलले प्रतिप्रश्न नउठाउने गरी काम गर्ने प्रतिबद्धता व्यक्त गर्दै कर्णालीलाई विकास र समृद्धिको बाटोमा लैजाने बताए । कँडेल चैत्र २७ गते मुख्यमन्त्री नियुक्त भएका थिए ।
