नेपालगञ्ज : नेपालगञ्जमा मंगलबार ७ जनालाई कोरोना पुष्टि भएको छ ।
भारतका विभिन्न ठाउँबाट आएका १ सय १७ जनाको परीक्षण गर्दा सात जनामा कोरोना देखिएको हो । उनीहरुको नेपालगञ्जस्थित जमुनाहा नाकामा जाँच गरिएको थियो ।
कोरोना देखिएका सात जनामध्ये ६ जना बाँके र एक जना दाङ जिल्लाका छन् । बाँकेको राप्तीसोनारी गाउँपालिकाका ४ जना, कोहलपुर नगरपालिका र जानकी गाउँपालिकाका एक–एक जना रहेका छन् । उनीहरु भारतको जम्बु काश्मिरबाट आएका हुन् ।
नेपालगञ्ज उपमहानगरपालिकाका स्वास्थ्य महाशाखाका जनस्वास्थ्य निरीक्षक तेज वलीले कोरोना देखिएकाहरुमा सामान्य लक्षण देखिएको र आत्तिनु पर्ने अवस्था नरहेको बताए ।
