नेपाल भारत सीमापारि भारत उत्तरप्रदेशका केही ठाउँमा बर्डफ्लु देखिएपछि बाँके जिल्ला बर्डफ्लुको उच्च जोखिममा छ । भारतबाट भित्रिने अवैध कुखुरा र चल्लाका कारण बाँकेमा पनि बर्डफ्लु फैलिने सम्भावना अत्याधिक बढेकोले यो जिल्ला उच्च जोखिममा परेको हो । भारतबाट लुकिछिपी हुँदै आएको पंक्षीजन्य पदार्थको अवैध आयातले गर्दा बाँकेमा जोखिम अत्याधिक बढेको जनाउँदै स्थानीय अगुवाहरुले जिल्लाको सम्पूर्ण नाकामा कडाइ गर्न माग गरेका छन् ।
बाँकेका किसान र व्यवसायीले सीमा नामा कडाइ नगरिने हो भने बर्डफ्लु भित्रिन सक्ने र त्यसबाट एकातिर मानव जीवन संकटमा पर्ने र अर्कोतिर आफ्नो व्यवसाय सखाप हुने चिन्ता व्यक्त गरेका छन् । जिल्लाकै सबैभन्दा ठूलो कुखुरा फार्म रजा ग्रुपका सञ्चालक मुख्तार राईले बर्डफ्लु भित्रिन नदिन पनि भारतबाट आउने कुखुरालाई रोक्न आवश्यक तथा अपरिहार्य भैसकेको बताए ।
अर्का कुखुरापालक व्यवसायी कादरी पोल्ट्री फार्मका सञ्चालक मुनिजर खानले बर्डफ्लु भित्रिनबाट रोक्ने हो भने भारतबाट हुँदै आएको कुखुराको अवैध आयातलाई रोक्नै पर्ने बताए । उता, प्रहरी प्रशासनले भने नाकाहरुमा कडाई गरिएको जनाउँदै दिनरात खटिएर सुरक्षाकर्मीले कुखुरा लगायत सबै अवैध आयातलाई रोक्ने काम गरिरहेको दावी गरेको छ ।
बाँकेका प्रमुख जिल्ला अधिकारी सूर्यबहादुर खत्रीले मुख्य नाकामा रहेका सुरक्षाकर्मी र क्वारेन्टाइनलाई कुखुरा र गुणस्तरहीन माछाको आयात रोक्न कडा निर्देशन दिइएको बताएकाछन् । उनले बर्डफ्लु भित्रिने आशंका अहिले बढेकोले झन् कडाइ गर्न नाकामा तैनाथ सबै सुरक्षाकर्मीलाई निर्देशन दिइएको जनाए ।
