नेपालगञ्ज : बाँकेको जानकी गाउँपालिकाको मानपुर नजिकै लुटेरा समुहको आक्रमणबाट एकजनाको ज्यान गएको छ । बुधवार राती आएका ५–७ जनाको समुहले लुटपाट गर्ने क्रममा प्रतिकार गर्दा उनीहरुको चिर्पट प्रहारबाट जानकी ३ रुद्रपुर नयाँबस्तीका सन्तोष कठरिया थारुको मृत्यु भएको हो ।
चिर्पट दाउराको प्रहारबाट गम्भीर घाइते भएका थारुको उपचारका क्रममा मृत्यु भएको प्रहरीले जनाएको छ । मध्यराती साढे १२ बजेको समयमा कठरियाको घरमा जबरजस्ती प्रवेश गर्न खोजेका समुहको प्रतिकार गर्दा अज्ञात समुहले उनीमाथि चिर्पट दाउराले प्रहार गरेको बाँके प्रहरी प्रमुख प्रहरी उपरीक्ष सुवास चन्द्र बोहराले बताए । लुटपाटकै उद्देश्यले आएको अनुमान गरिएको सो समुहको प्रतिकारका क्रममा मृतक केडेरियाकी श्रीमती सविता राजबंशी थारु पनि घाइते भएकी उनले बताए ।
अज्ञात समुहबाट आक्रमण भएको जानकारी प्राप्त भए लगत्तै प्रहरी परिचालन गरिएको र घाइतेको उद्धारसहित खोजी अभियान थालिएको एसपी बोहराले बताए । लुटेराहरुले सबिताले लगाएको सुनको फुली र ४० हजार नगद लुटेर लगेको प्रहरीले जनाएको छ ।
प्रहरीका अनुसार खजुरारोडबाट भित्रि सडकमा पर्ने रुद्रपुरमा एकान्तमा रहेको घरमा लुटपाटकै उद्देश्यले सो समह आएको अनुमान गरिएको छ । घटना भएको स्थान नेपालगञ्ज उपमहानगरसँग जोडिएको सिमाना क्षेत्रमा पर्दछ ।
