नेपालगञ्ज : दाङमा भाइले भाला (धारीलो हतियार) प्रहार गर्दा दाई गम्भिर घाइते भएका छन् । शान्तिनगर गाउँपालिका वडा नं. १ नयाँ बस्ती निबासी ३० वर्षीय लिला बहादुर वलीले आफ्नै दाई ३८ बर्षीय देबबहादुर वलीलाई भाला प्रहार गरी गम्भीर घाइते बनाएका हुन् ।
जिल्ला प्रहरी कार्यालय दाङका प्रवक्ता एबम् प्रहरी नायव उपरीक्षक मुकुन्द प्रसाद रिजालका अनुसार बुधबार राती करिब १० बजे घरायसी विवादमा भाई लिलाले दाई देबबहादुरलाई भाला प्रहार गरेर गम्भीर घाइते बनाएका थिए ।
भाला प्रहारबाट गम्भीर घाइते भएका देबबहादुरलाई राप्ती प्रादेशिक अस्पताल तुलसीपुरमा सामान्य उपचारपछि थप उपचारका लागि कोहलपुर ल्याइएको छ ।
उनको दाहिने छातिमा भाला रोपिएको छ । भाला प्रहार गर्ने लिलाबहादुरलाई प्रहरीले पक्राउ गरेको छ । घटनाका बारेमा थप अनुसन्धान भईरहेको प्रहरी नायव उपरीक्षक रिजालले जानकारी दिए ।
