नेपालगञ्ज : कोरोना भाइरस संक्रमणबाट बाँकेमा थप दुईजनाको मृत्यु भएको छ । मृत्यु हुनेमा एकजना बाँकेका हुन् भने अर्का बर्दियाका भएको जिल्ला कोभिड व्यवस्थापन केन्द्रले जनाएको छ ।
कोहलपुर नगरपालिका–५ का २२ वर्षीय पुरुषको शनिवार राती मृत्यु भएको छ । उनलाई असोज ४ गते कोभिड पुष्टि भएको थियो । त्यसको भोलिपल्ट उनी भेरी अस्पतालमा भर्ना भएका थिए ।
उपचारका क्रममा स्वास्थ्यमा सुधार नआउँदा उनको शनिवार राती साढे एक बजे मृत्यु भएको केन्द्रका फोकपर्सन तेज वलीले जानकारी दिनुभयो । यस्तै बारबर्दिया नगरपालिका–४ का ७२ वर्षीय पुरुषको पनि शनिवार राती मृत्यु भएको छ । भदौ ३० गते कोभिड पुष्टि भएका उनी त्यसैदिन भेरीमा भर्ना भएका थिए ।
योसँगै कोरोना संक्रमणबाट बाँकेमा मृत्यु हुनेको संख्या ३३४ पुगेको छ भने उपचारका लागि बाँकेमा आएर मृत्यु हुनेको संख्या ४१८ पुगेको छ ।
