सदरलाइनडटकम,
नेपालगञ्ज : जिल्ला प्रशासन कार्यालयले प्राकृतिक स्रोतसाधनको दोहनका बिरुद्ध अभियान सञ्चालन गर्दै अबैध बालुवा प्रशोधन र क्रशर बन्द भएपछि उनीहरु पुनः सञ्चालनका लागि शक्तिकेन्द्र धाउन सुरु गरेका छन् ।
शक्तिको आडमा नदीजन्य पदार्थको उत्खनन र प्रशोधन गर्ने बालुवा प्रशोधन उद्योग र क्रशर उद्योग संबन्धित निकायमा दर्ता र नबिकरण नगरी वर्षौदेखि सञ्चालन गर्दै आएकाहरुलाई जिल्ला अनुगमन समितिको निर्णयले बज्रपात परेको हो ।
बाँकेमा सञ्चालनमा रहेका २७ वटा क्रशर तथा बालुवा प्रशोधन केन्द्र मध्ये ३ वटामात्रै दर्ता र नबिकरण भएको पाईएकोले २४ वटा दर्ता र नबिकरण नभएको क्रशर बालुवा प्रशोधन केन्द्रको विद्युत लाईन काट्नुको साथै ती उद्योग बन्द गर्न प्रशासनले कडाई गरेपछि उनीहरु शक्तिकेन्द्र धाउन थालेका हुन ।
राप्ती सोनारी गाउपालिका–२ मुगुवा सामुदायिक बनको मुगुवा खोलाबाट प्रहरीले एक्जाभेटर नियन्त्रणमा लिएर आवश्यक कारवाहीको लागि गाउपालिकालाई बुझाएको बाँकेका प्रहरी प्रमुख ओमबहादुर रानाले जानकारी दिए । । उनले खोलाको छेउमा जम्मा पारेर राखेको नदीजन्य पदार्थ पनि के कस्तो हो सो को बारेमा समेत बुझ्नको लागि गाउपालिकालाई ध्यानकर्षण गराएको बताए ।
बाँकेमा राजनीतिक संरक्षण र मिलेमतोमा बाताबरणीय परिक्षण नै नगराई अनाधिकृत तरिकाले खोला र नदीमा एक्जाभेटर प्रयोग गरी नदीजन्य पदार्थको दोहन गर्दै आएको जनगुनासो व्यापक आएपछि स्थानीय प्रशासनले कडाई गर्न सुरु गरेको हो ।
