सदरलाइनडटकम,
नेपालगन्ज : भार्गव विकास बैंक दोस्रो सद्भाव एकल तीज गीत नृत्य प्रतियोगितामा खजुरा की सम्प्रिया खड्का प्रथम पुरस्कार प्राप्त गर्न सफल भएकी छन् । गत वर्ष आयोजित प्रथम सद्भाव एकल तीज गीत प्रतियोगितामा दोस्रो भएकी खड्काले यसवर्ष प्रथम हुँदै नगद ३० हजारसहित प्रमाणपत्र प्राप्त गरिन् । रेडियो सद्भाव ९१.२ मेगाहर्जको आयोजनामा शनिवार नेपालगन्जमा सम्पन्न प्रतियोगितामा १६ जनालाई पछि पार्दै उपाधि बाँके खजुरा गाउँपालिका ४ की खड्का प्रथम भएकी हुन् ।
प्रतियोगितामा नेपालगन्ज १८ की गरिमा चौधरी द्वितिय, खजुरा ३ की समिक्षा थापा तृतिय र नेपालगन्ज १० की विनिता आचार्यले सान्त्वना पुरस्कार प्राप्त गरिन् । उनीहरुलाई क्रमशः १५ हजार, १० हजार र ५ हजार नगदसहित प्रमाणपत्र प्रदान गरिएको थियो ।
सुन्दर गुरुङ, भरत महतो र गीता क्षेत्री वर्नवाल निर्णायक रहेको प्रतियोगिताका विजेतालाई सद्भाव नेपालकी उपाध्यक्ष शशी स्वाँर, रेडियो सञ्चालक समितिका अध्यक्ष सञ्जय सिंह, रेडियोका प्रबन्ध निर्देशक दामोदर भण्डारी लगायतले पुरस्कार तथा प्रमाणपत्र प्रदान गरेका थिए । स्थानीयस्तरमा लुकेर रहेका प्रतिभालाई प्रोत्साहित गर्दै तीज संस्कृतिको संरक्षण गर्ने उद्देश्यले प्रतियोगिता आयोजना गरिएको आयोजकले बताएको छ ।
खजुराकी ‘सम्प्रिया’ बनिन् एकल तीज गीत विजेता
२३ भाद्र २०७५, शनिबार १८:२१
