नेपालगञ्ज : बाँकेको गनापुरमा बिहीबार बिहान भएको बस दुर्घटनामा ज्यान गुमाउनेको संख्या ३ पुगेको छ । गम्भीर घाइते भएका थप एक जनाको उपचारको क्रममा मृत्यु भएसंगै सो दुर्घटनामा परेर ज्यान गुमाउनेको संख्या ३ पुगेको हो ।
जिल्ला प्रहरी कार्यालय बाँकेका प्रवक्ता एवम् प्रहरी नायव उपरीक्षक नारायण डाँगीले जानकारी दिए । उनले दिएको जानकारी अनुसार दाङ, घोराहीका ३० वर्षिय बिमल राईको नेपालगञ्ज मेडिकल कलेज शिक्षण अस्पताल कोहलपुरमा उपचारका क्रममा दिउँसो मृत्यु भएको हो ।
यसअघि दुर्घटनामा गम्भीर घाइते भएका दाङ तुलसीपुरका ६० वर्षीय मानबहादुर ओली र तुलसीपुर कै २४ वर्षीय सन्तोष भुषालको भेरी अस्पतालमा मृत्यु भएको थियो । दाङको तुलसीपुरदेखि नेपालगञ्ज आउँदै गरेको भे १ ख २१२८ नम्बरको यात्रुबाहक बस दुर्घटनामा परेको थियो ।
दुर्घटनामा परेका घाइते २६ जनाले नेपालगञ्ज र कोहलपुरमा उपचार गराइरहेका छन् । प्रहरी प्रवक्ता डाँगीका अनुसार भेरी अस्पतालमा २१ र नेपालगञ्ज मेडिकल कलेज शिक्षण अस्पताल कोहलपुरमा बाँकी ४ जनाको उपचार भइरहेको छ । घाइते एक जनाको नेपालगञ्ज मेडिकल कलेज शिक्षण अस्पताल नेपालगञ्जमा उपचार भएकोमा डिस्चार्ज भईसकेका छन् ।
