नेपालगञ्ज : बाँकेमा आकाशे पानीको भर पर्दा साउनको दोस्रो साता सकिन लाग्दा पनि हालसम्म धान खेती हुने भू–भाग मध्ये ७० प्रतिशतमा रोपाइँ सकिएको छ । रोपाइँका लागि सिचाईको सुविधा नभएको कारण रोपेको खेतमा समेत सुकेर धाँजा फाटेको छ ।
साउन महिनाको दोस्रो हप्तासम्म पनि बाँकेमा पर्याप्त वर्षा नहुँदा सिचाईको सुविधा नपुगेको ठाउँमा यस वर्ष धान रोपाइँमा ढिलाइ भएको छ । उसो त किसानहरु खाल्टाखुल्टीमा जमेको पानी र बोरिङ्गको मदतले धान रोपे पनि वर्षात हुन नसकेको कारण रोपेको खेत पनि सुक्दै गएको गुनासोे छ ।
धानको विउ पनि बुढो हुदै गएको र खेतमा पानी नभएको कारण टाढा टाढाबाट पानीको जोहो गरेर रोपाई गर्दै आएको नेपालगञ्ज– १३ उदयपुरका किसानको भनाई छ ।
खेती किसानीको बेलामा सिचाईको व्यवस्था नहुनु, रासायनिक मलमा सहकारीको सिण्डिकेटका कारण आफुहरुले नपाउनु र सिचाईको लागि डिजल, पेट्रोल महंगो हुनु, विद्युतको अनियमितताका कारण विभिन्न हन्टर खादै खेती गर्नु परेको अर्का किसानको दुखेसो छ ।
कृषि ज्ञान केन्द्र बाँकेका प्रमुख शकिल अहमदले बाँकेमा साउनको १० गतेसम्म करिव ७० प्रतिशत रोपाई भएको बताए । उनले वर्षात न्युन भएको कारण किसानलाई धान रोप्नको लागि समस्या भएको औल्याए ।
बाँकेमा ३४ हजार ८ सय ५० हेक्टर क्षेत्रफलमा धानखेती हुँदै आएको छ । साउनको १० गतेसम्म ७० प्रतिशत रोपाई भए पनि सुख्खाको कारण रोपेको खेत पनि सुक्न थालेको छ ।
