नेपालगञ्ज : होटल व्यवसायीले आफ्नो व्यवसायलाई राज्यले उद्योगको मान्यता दिनुपर्ने माग गरेकै बेलामा सँस्कृति, पर्यटन तथा नागरिक उड्ययनमन्त्री बद्रीप्रसाद पाण्डेले आर्थिक विकास र समृद्धिका लागि पर्यटन क्षेत्र सरकारको पहिलो प्राथमिकतामा रहेको बताएका छन् ।
होटल ब्यवसायी महासङ्घ लुम्विनी प्रदेशको तेस्रो साधारणसभा तथा दोस्रो अधिवेशनको शुक्रबार नेपालगञ्जमा उद्घाटन गर्दै मन्त्री पाण्डेले पर्यटन विकासका लागि नेपाली संस्कार अनुसार पाहुनालाई व्यवहार हुनुपर्ने बताए ।
मन्त्री पाण्डेले भने, ‘ भुकम्प र कोभिडपछि पर्यटनक्षेत्रले विस्तारै लय समात्ने क्रममा छ,। मुलुकको अर्थतन्त्र बलियो बनाउन होटल क्षेत्रको मुख्य भुमिका रहन्छ ।’
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
उनले पर्यटन नीति र ऐन निर्माण र संशोधनमा ध्यान दिइने बताउदै गौतम बुद्ध अन्तर्राष्ट्रिय बिमानस्थल छिटोभन्दा छिटो सञ्चालनका लागि पहल गरिने प्रतिबद्धता जनाए । उनले पर्यटन नीतिमा शंशोधन भएमा धेरै भन्दा धेरै होटल व्यवसायीका समस्या र मागको सम्बोधन हुने जिकिर गरे ।
सो अवसरमा लुम्बिनी प्रदेशसभा सदस्य रत्न खत्रीले पर्यटन विकासका लागि राज्यको नीति र व्यवहारमा सुधार हुन आवश्यक रहेको बताए । उनले पर्यटकलाई गरिने व्यवहार मैत्रीपूर्ण हुनुपर्ने कुरामा जोड दिए ।
होटल ब्यवसायी महासङ्घका अध्यक्ष भाष्कर काफ्लेले प्रदेशभित्र साना–ठुला गरी करिब ११ हजार होटल ब्यवसाय सञ्चालनमा रहेको भन्दै उनीहरुका लागि विशेष सहयोगका कार्यक्रम ल्याउन माग गरे । प्रदेशभित्र होटल ब्यवसायमा करिब ६० हजारले प्रत्यक्ष रोजगारी पाएको उनले बताए । राज्यले होटल ब्यवसायीलाई हेर्ने दृष्टिकोणमा परिबर्तन हुन आवश्यक रहेको उनले आग्रह गरे ।
यस क्षेत्रमा लुम्बिनीमा करिब दुई खर्ब बराबरको लगानी रहेको उनको भनाइ छ । होटल ब्यवसायबाट बार्षिक ४० करोड कर राज्यले सङ्कलन गर्नेगरेको छ । अधिबेशनमा प्रदेशभरका १८ सस्थाका करिव २ सय प्रतिनिधिको सहभागिता रहने जनाईएको छ ।