नेपालगञ्ज : शुक्रबारदेखि सुरू भएको ‘टुर द ठाकुरद्वारा’ सम्पन्न भएको छ । नेपालगञ्ज साइकिलिङ क्लबको आयोजनामा बाँके र बर्दियामा पर्यटन प्रवर्द्धनका लागि आयोजित छैटौँ संस्करण बि वाई डि ‘टुर दि ठाकुरद्वारा’ आइतवार बर्दियाको ठाकुरद्वारामा सम्पन्न भएको हो ।
साइकल यात्रामा ठाकुरबाबा नगरपालिकाका उपप्रमुख बिना भट्टराईले देशैभरिका साइकल यात्री बर्दियामा आउँदा यसले यहाँको पर्यटन प्रवर्द्धनसँगै आर्थिक क्षेत्रमा पनि ठूलो टेवा पुर्याएको बताए । विश्व साइकल यात्री अजित बरालले शरीरलाई स्वास्थ्य राख्न साइकल चलाउन सुझाव दिए ।
भारतीय साईकल यात्री डा अनिकेत राय नेपालमा साइकीलिङ गर्न पाउँदा आफूलाई निकै खुसी लागेको बताए । उनले साइकल यात्राले नेपाललाई मात्र नभई विश्वलाई नै परिवर्तन गर्न सक्ने बताउँदै साइकल यात्रालाई निरन्तरता दिन सुझाव दिए ।
कार्यक्रम संयोजक सतिश निरौलाका अनुसार बाँकेदेखि बर्दियाको ठाकुरद्वारासम्मको उक्त साइकल यात्रा एक सय चार किलोमिटर लामो दुरीको रहेको थियो । साइकलयात्राका सहभागीहरु बाँकेको कोहलपुर हुँदै बर्दियाको केदारेश्वर धामदेखि सत्खलुवाको हुलाकी मार्ग हुँदै ठाकुरद्वारा पुगेका थिए ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
सो यात्रामा सहभागी साइकल यात्रीमार्फत यहाँको पर्यटनसँगै बजार व्यवसाय चलायमान बनाउन सहयोग पुग्दै आएको आयोजक नेपालगञ्ज साइक्लिङ क्लबका अध्यक्ष प्रदीप सापकोटाले बताए । उनले साइकलको यस्ता खाले कार्यक्रमले देशैभरिका साइकल यात्रीको सम्बन्धलाई बाँधेको बताए ।
उनका अनुसार दुई दिने ‘टुर द ठाकुरद्वारा’ कार्यक्रम व्यवस्थापनका लागि २६ लाख खर्च भएको छ । उक्त साइकल यात्रामा भारतसँगै झापा, विराटनगर, धरान, बारा, पोखरा, काठमाडौँ, ललितपुर, भक्तपुर, काभ्रे, नवलपरासी, धनगढी, महेन्द्रनगर, दाङलगायत देशका ठूला सहरबाट दुई सयभन्दा बढी साइकल यात्रीको सहभागिता थियो ।
सात वर्षका बालकदेखि ७० वर्ष उमेर समूहका साइकल यात्रीले ‘टुर द ठाकुरद्वारा’ मा सहभागिता जनाएका थिए । बाँके र बर्दियाका धार्मिक तथा पर्यटकीयस्थलको प्रचार गर्ने उद्देश्यले विगत छ वर्षदेखि टुर द ठाकुरद्वारा आयोजना हुँदै आएको छ ।