नेपालगञ्ज : बाँकेको बैजनाथमा नेकपा एमालेले जनतासँग प्रदेशसभा सदस्य कार्यक्रम शुरुवात गरेको छ । बाँके क्षेत्र नम्बर ३(१) बाट निर्वाचित प्रदेशसभा सदस्य रत्न खत्री र आम जनताबीच प्रत्यक्ष अन्तरक्रिया हुने गरि एमालेले आईतबार चिसापानीबाट यो कार्यक्रमको शुरुवात गरेको हो ।
कार्यक्रममा प्रदेशसभा सदस्य खत्रीले निर्वाचनको समयमा जनताबीच गरिएका प्रतिवद्धता कार्यान्वयन भईसकेको बताए । उनले जनताबाट प्राप्त सुझावका आधारमा अघि बढ्ने बिश्वास दिलाए ।
एमाले प्रदेश कमिटी सदस्य घननाथ खनाल, नेताहरु रुपबहादुर मल्ल,पुणितविक्रम शाह, निर्मला मल्ल, प्रेम सुवेदी सहितको उपस्थितीमा चिसापानीबाट कार्यक्रमको शुरुवात भएको छ । कार्यक्रम अन्तर्गत एकदिनमा एउटा वडाका विभिन्न वस्तीमा जनता र प्रदेशसभा सदस्यबीच दोहोरो संवाद र अन्तरक्रिया हुने गरेको छ ।
प्रदेशसभा सदस्य खत्रीले निर्वाचन सम्पन्न भएको एकबर्षको समीक्षा समेत हुने भएकाले जनताबीच पुगेको बताए । बैजनाथमा कार्यक्रम सम्पन्न भएपछि खजुराका वडा नम्बर ५,६,७ र ८ मा पनि यो कार्यक्रम सञ्चालन हुने भएको छ ।
पार्टी कार्यकर्ता र आम जनतासँग निर्वाचनको समयमा गरिएको प्रतिवद्धता कार्यान्वयन भए नभएको बिषयमा आम जनतासँग साक्षात्कारका लागि कार्यक्रम सञ्चालन गर्न लागिएको नेकपा एमाले बैजनाथ गाउँपालिका कमिटीका सचिव प्रेम सुवेदीले जानकारी दिए ।
