नेपालगञ्ज : दसैका लागि १८ करोड ९६ लाख नयाँ नोट सर्बसाधारण नागरिकले नेपाल राष्ट्र बैंकको नेपालगञ्जस्थित प्रादेशिक कार्यालयबाट साटेका छन् । गत असोज २९ गतेदेखी कात्तिक ३ गतेसम्म बैंकले नयाँ नोट साट्ने ब्यवस्था मिलाएको थियो ।
राष्ट्र बैंक नेपालगञ्जका प्रमुख (निर्देशक) गिरिजाप्रसाद कोइरालाले दसैका लागि सर्बसाधारण नागरिकले १८ करोड ९६ लाख रुपैयाँ साटेर लगेको जानकारी दिए । बैंकले विगतभन्दा यसपटक फरक तरिकाले नोट साट्ने ब्यवस्था मिलाएको थियो । सर्बसाधारणको सहजताका लागि बैंकले यसपटक क्युआर कोडमार्फत पनि नयाँ नोट साट्ने ब्यवस्था मिलाएको हो ।
सर्बसाधारणले क्युआर कोडमार्फत मात्रै ५ करोड ६ लाख नयाँ नोट साटेर लगेको निर्देशक कोइरालाले बताए । राष्ट्र बैंकले सर्बसाधारणलाई एक सय, पचास, बीस, दश र पाँच रुपैयाँका नोट गरी कुल १८ हजार ५ सय रुपैयाँ बराबर (एक सेट) नोट उपलब्ध गराएको छ ।
राष्ट्र बैंक नेपालगञ्जबाट मात्रै यसपटक करिव १० हजार जना सर्बसाधारण नागरिकले सेवा लिएको बताइएको छ । यसमध्ये क्युआर कोडमार्फत २ हजार २ सय ९३ जनाले सेवा लिएका छन् ।
