कोहलपुर (बाँके) : बाँकेको कोहलपुर नगरपालिका १३ भरैयामा बाघले खोरमै गएर बाख्रा मारेको छ । वडा नं. १३ का शसिराम वली र नैने रानाका १४ वटा बाख्रालाई खोरमै गएर मारेको हो ।
कोहलपुर नगरपालिका वडा नं. १३ का वडा सदस्य बलबहादुर घर्तीले राती बाघले खोरबाट तानेर केही बाख्रा मारेर छाडेको छ भने केही आधा खाएको बताए । घर्तीका अनुसार ८ वटा खसी र अन्य बाख्रा रहेका छन् । अझै ४ वटा बाख्रा भेटिएका छैनन् ।
बर्षौंदेखि दुःख गरी पालेको सम्पत्ति यसरी रातारात साखाप पारेपनि राष्ट्रिय निकुञ्जले ध्यान नदिएको वडा सदस्य घर्तीले आरोप लगाए ।
यस्तै वडाध्यक्ष डम्बर बहादुर खड्काले कृषकहरुको जिविकोपार्जनसँग जोडिएकाले केन्द्र र प्रदेश सरकारले क्षतिपूर्ति दिनुपर्ने बताए ।
