नेपालगञ्ज : वर्डफ्लु भित्रिने आशङ्कामा भारतमा उत्पादित चल्ला, कुखुरा र अण्डाको आयातमा प्रतिबन्ध लगाइए पनि भारतबाट अवैध रूपमा ल्याउने क्रम रोकिएको छैन ।
नाकामा तस्करी गर्नेहरूले दिनहुँजसो ठुलो परिमाणमा प्रतिबन्धित चल्ला र कुखुरा भित्र्याइरहेका छन् । विभिन्न सहायक बाटो हुँदै दिनदिनै तस्करले साइकल, मोटरसाइकल, रिक्सा र गाडीमा राखेर चल्ला र कुखुरा भित्र्याइरहेका छन् ।
नेपाली किसान र व्यवसायीको आग्रहमा मुख्य र साइड दुवै नाकामा कडाइ गरे पनि अवैध चल्ला र कुखुरा भित्रिने क्रम भने निरन्तर जारी छ । प्रहरीको सक्रियताले मात्र सो रोक्न नसकिएपछि नेपाली किसान स्वयं नाकामा खटिने गरेका छन् । तर पनि अवैध रूपमा भित्रिने क्रम नरोकिएको उनीहरूको गुनासो छ ।
प्रहरीले नाकामा अहिले निकै कडाइ गरेको जनाए पनि गत बुधवार बिहान कोहलपुरबाट किसानले भारतबाट ल्याइएका एक हजारभन्दा बढी अवैध चल्ला बरामद गरेर प्रहरीलाई बुझाएका थिए ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
इलाका प्रहरी कार्यालय कोहलपुरका प्रमुख डिएसपी सुन्दर तिवारीका अनुसार किसानले नियन्त्रणमा लिएर खबर गरेपछि प्रहरीले कोहलपुर –११ दशगजाबाट दुई दिनअघि मात्र भे १ प ३४१० नम्बरको अटोमा राखेर लैजान लागिएको १६ काटुर्नका एक हजार चल्ला नियन्त्रणमा लिएको थियो ।
डिएसपी तिवारीका अनुसार मीनबहादुर खनालले चलाएको सो अटोबाट उक्त चल्ला बरामद गर्नुका साथै मुगु खप्तयाड गाउँपालिका –३ का प्रवेश शाहीलाई पनि नियन्त्रणमा लिएर चल्ला र दुबैजनालाई पशु सेवा क्वारेनटाइनमा बुझाइएको थियो ।
कुखुरा व्यवसायी मञ्च नेपालगञ्ज बाँकेका अध्यक्ष धर्मराज पोखरेलले नेपाल–भारत नाका पार गरेर अटोमा राखी यति धेरै अवैध चल्ला कोहलपुर पुगे पनि सुरक्षा निकायको आँखा नपर्नु र किसानले समात्न लगाउनु गम्भीर विषय भएको बताए ।
खुला सिमानाका कारण भारतबाट दिनहुँ ठुलो परिमाणमा बोइलर कुखुरा र चल्ला भित्रिँदा कुखुरापालक किसान र मासु व्यवसायी दुवै मर्कामा परेको किसान र व्यवसायीको गुनासो छ ।