बर्दिया : बर्दिया राष्ट्रिय निकुञ्जले विश्व बाघ दिवसको अवसरमा शनिबार विविध कार्यक्रमसहित मनाएको छ । सन् २०१० देखि बाघ दिवस अन्तर्राष्ट्रियस्तरमा मनाउँदै आइएको छ ।
ठाकुरद्वारास्थित चोकमा निर्माण गरिएको बाघको सालिकमा बर्दिया निकुञ्जका प्रमुख अशोक भण्डारी लगायतले पूजा गरेका थिए । पूजा सकिएपछि स्थानीय विद्यालयका बालबालिकाले पञ्चे बाजा बजाउँदै सयौं विद्यार्थी, संरक्षणकर्मी लगायत कर्मचारी र्यालीमा सहभागी भएका छन् ।
र्याली निकुञ्जको मुख्यालयमा गएर टुंगिएको थियो । निकुञ्ज परिसरमा सञ्चारकर्मी, संरक्षणकर्मी र निकुञ्ज प्रशासन बाघ संरक्षण, यसको चुनौती विषयक अन्तरक्रिया गरिएको छ ।
करिब सय वर्षअघि विश्वमा बाघको संख्या १ लाखको हारहारीमा थियो । एक दशक अघिसम्म बाघको संख्या ३ हजार २ सयमा सीमित भएपछि विश्वमा यस्को संख्या दोब्बर बनाउने लक्ष्यसहित सन् २०१० नोभेम्बरमा रुसको सेन्ट पिटर्सबर्गमा भएको भेलाले निर्णय गरेको थियो ।
सोही अनुसार नेपालले बाघको संख्या दोब्बर बनाउन सफल भएको छ । बर्दियामा गत वर्षको गणनामा ८७ बाट बढेर १ सय २५ बाघको संख्या पुगेको छ । राष्ट्रिय निकुञ्ज तथा वन्यजन्तु संरक्षण ऐन २०२९ मा बाघलाई संरक्षित वन्यजन्तुको सूचीमा राखिएको छ ।
