नेपालगञ्ज : साउन महिना शुरु हुन लागिसक्दा समेत बाँकेमा पर्याप्त वर्षा नहुँदा हालसम्म ५० प्रतिशत मात्र रोपाईं भएको छ । कृषि ज्ञान केन्द्र नेपालगञ्जका अनुसार असार–साउन महिना शुरु हुन लागेको बेलासम्म पनि पश्चिम नेपालमै सबैभन्दा बढी धान उत्पादन हुने जिल्लामध्ये बाँकेमा वर्षा नहुँदा हालसम्म ५० प्रतिशत मात्र रोपाईं सकिएको हो ।
कृषि ज्ञान केन्द्र नेपालगञ्जका प्रमुख शकील अहमदले यस वर्ष हालसम्म बाँकेमा राम्रो वर्षा नै नभएकाले असार ३१ गते भइसक्दा समेत आधा मात्रै रोपाइँ सम्पन्न हुन सकेको बताए । उनले सिक्टा सिँचाइ आयोजनाको नहर पुगेको क्षेत्र र कृषि ज्ञान केन्द्रले स्यालो ट्युबवेलमार्फत सिँचाइ सुविधा पुगेको क्षेत्रको करिब १८ हजार हेक्टर क्षेत्रमा मात्रै हालसम्म रोपाईं भएको बताए ।
जिल्लामा राष्ट्रिय गौरवको आयोजना सिक्टा सिँचाइ आयोजनाले गर्दा किसानलाई धेरै राहत भएपनि अझै अधिकांश ठाउँमा आकाशे पानीकै भरमा रोपाइँ गर्नुपर्ने बाध्यता छ । कृषि ज्ञान केन्द्र नेपालगञ्जका प्रमुख अहमदले सिक्टा सिँचाइ आयोजनाको निर्माण पूरा हुनुका साथै अन्य विभिन्न साना सिँचाइ योजनाको निर्माण गर्न सकिए मात्रै समयमा धान रोपाईं गर्न सकिने बताए ।
उनका अनुसार अहिलेसम्म पनि पर्याप्त वर्षा नभएका कारण जिल्लाको नरैनापुर र जानकी गाउँपालिका तथा कोहलपुर नगरपालिकाका अधिकांश जग्गामा रोपाइँ हुन सकेको छैन । प्रमुख अहमदले भने, ‘अझै केही दिन पर्याप्त वर्षा भएन भने गतवर्ष सुख्खा भएको नरैनापुरमा फेरि पनि समस्या हुने देखिएको छ । सो पालिकामा अन्य वैकल्पिक व्यवस्थाबारे अहिलेबाट नै योजना बनाउन थालेका छौं ।’
जिल्लाको खजुरा, बैजनाथ, राप्तीसोनारी र डुडुवा गाउँपालिकामा भने सिँचाइ सुविधा अन्य ठाउँभन्दा बढी रहेकाले यी पालिकामा बढी रोपाईं भएको कृषि ज्ञान केन्द्रले जनाएको छ । साउन शुरु हुन लाग्दासम्म पनि पर्याप्त पानी नपर्दा जिल्लामा यस वर्ष समयमा धान रोपाईं सम्पन्न नहुने र सोही कारणले धान उत्पादन घट्ने किसानहरुले जनाएका छन् ।
बाँकेमा ३६ हजार पाँच सय हेक्टर जमिनमा धानखेती हुने गरेकोमा हालसम्म करिब १८ हजार हेक्टरमा मात्रै रोपाईं हुन सकेको छ ।
