नेपालगञ्ज : लुम्बिनी प्रदेशका नवनियुक्त मुख्यमन्त्री डिल्लीबहादुर चौधरीले पद तथा गोपनीयताको शपथ लिएका छन् । प्रदेश प्रमुखको कार्यालयमा प्रदेश प्रमुख अमिक शेरचनले उनलाई संविधानको धारा १६८ को उपधारा २ बमोजिम शपथ खुवाएका हुन् ।
शपथ ग्रहण समारोहमा निवर्तमान मुख्यमन्त्री लीला गिरीसहित गठबन्धन दलका नेता–कार्यकर्ता सहभागी थिए । सत्ता साझेदार दलहरूबीच मन्त्रालय भागबण्डामा कुरा नमिल्दा तीन मन्त्रीले बिनाविभागीय मन्त्रीका रुपमा शपथ लिने भएका छन् ।
मुख्यमन्त्री चौधरीले माओवादी केन्द्रका धनबहादुर मास्की राना, नागरिक उन्मुक्तिका धर्मबहादुर चौधरी र लोकतान्त्रिक समाजवादी पार्टीका सन्तोष पाण्डेलाई बिनाविभागीय मन्त्री नियुक्त गरेका छन् ।
