नेपालगञ्ज : नेपालगञ्ज वडा नम्बर १२ मा आज नेपाली कांग्रेसको वडा भेला सम्पन्न भएको छ । वडा सभापति रामु चिडिमारको सभापतिवत्व एवम् जिल्ला सचिव सुधांशु कोइरालाको प्रमुख आतिथ्यतामा वडा भेला सम्पन्न भएको हो ।
भेलालाई सम्बोधन गर्दै कोइरालाले पार्टीलाई एकताबद्ध बनाएर लैजानुपर्ने आवश्यकता औल्याउँदै कसैले पनि गुटको राजनीति गर्न नहुनेमा जोड दिए । युवाहरुले गुटलाई प्रबद्र्धन गर्ने गतिविधि गर्न नहुने उनको भनाई छ ।
वडा भेलालाई क्षेत्र नम्बर २ का क्षेत्रीय सभापति रमेशकुमार गुप्ता, महाधिवेशन प्रतिनिधि अजितकुमार शर्मा, पूर्व पार्टी सचिव एवम् पूर्व क्षेत्रीय सभापति सुरेन्द्रनाथ सापकोटा लगायतले सम्बोधन गरेका थिए । भेलामा जिल्ला सदस्य सुशिला पन्तले स्वागत मन्तब्य व्यक्त गरेकी थिइन् ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
भेलामा जिल्ला सदस्य अमृत आचार्य, क्षेत्रीय सचिव प्रदिप साहु, सहसचिव तरुणकुमार बज्राचार्य, प्रदेश सहसचिव राजकुमार बाल्मिकी लगायत उपस्थित रहेको वडा सचिव सुकराम चिडिमारले जानकारी दिए । सुकरामका अनुसार त्यसक्रममा रेडक्रस जिल्ला उपसभापतिमा नवनिर्वाचित सुरेन्द्रनाथ सापकोटा र जिल्ला सदस्य अजितकुमार शर्मालाई बधाई ज्ञापन तथा सम्मान गरिएको थियो ।
यस्तै ग्यास सिलिण्डर विस्फोटबाट घाइते भएका कांग्रेस नेता एवम् सांसद डा. चन्द्र भण्डारीको शिघ्र स्वास्थ्य लाभको कामना गर्दै सोही घटनामा परी निधन भएकी भण्डारीकी आमाप्रति श्रद्धाञ्जली अर्पण गरिएको छ ।