नेपालगञ्ज : नेपालगञ्ज उपमहानगरपालिका–४ मा थप दुई जनामा डेंगी देखिएको छ । बिहीवार गरिएको निःशूल्क स्वास्थ्य परीक्षणमा थप दुई जनामा डेंगी देखिएको नेपालगञ्ज उपमहानगरपालिका स्वास्थ्य महाशाखाका किटजन्य रोग फोकलपर्सन तेज वलीले जानकारी दिए ।
४८ जनाको नमुना जाँच गर्दा २१ वर्षका पुरुष र ३६ वर्षकी महिलामा डेंगीको संक्रमण पुष्टि भएको हो ।
यस्तै ४९ वर्षकी महिलामा स्क्रब टाइफस देखिएको छ । नेपालगञ्ज उपमहानगरपालिका–४ मा यसअघि पनि ४ जना स्थानीयमा डेंगीको संक्रमण पुष्टि भएको थियो । बाँकेमा यसअघि ४४ जनामा डेंगु पुष्टि भइसकेको छ ।
तीमध्ये नेपालगञ्ज उपमहानगरपालिकाभित्र १५ जनालाई डेंगु देखिएकोमा चार जना वडा नम्बर ४ का रहेको वलीले बताए । किटजन्य रोगको संक्रमणबाट जोगिन स्वास्थ्य सावधानी अपनाउन स्वास्थ्यकर्मीहरुले आग्रह गरेका छन् ।
