राप्तीसोनारी (बाँके) : बाँकेको राप्तीसोनारी गाउँपालिकाको आर्थिक वर्ष २०७९/८० को विनियोजन विधेयक र आर्थिक विधेयक सर्वसम्मतिले पारित भएको छ । ११औं गाउँसभाको तेस्रो वैठकबाट मंगलवार विनियोजन विधेयक र आर्थिक विधेयक सर्वसम्मतिले पारित भएको हो ।
सभा अध्यक्ष तप्त बहादुर पौडेलले दुबै विधेयक सभामा निर्णयार्थ प्रस्तुत गरेका थिए । छलफलमा वडा नम्बर ७ का वडा अध्यक्ष रामलखन थारु, वडा नम्बर ९ का वडा अध्यक्ष सोहनलाल थारु, वडा नम्बर १ का वडा सदस्य भरत बुढाथोकी लगायतले भाग लिएका थिए ।
असार १० गते सुरु भएको गाउँसभामा अध्यक्ष पौडेलले १४ गते नीति कार्यक्रम प्रस्तुत गरेका थिए । उक्त वैठकमा नीति कार्यक्रम पारित गर्दै आर्थिक वर्ष २०७९/८० को बजेट प्रस्तुत गरिएको थियो ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
उपाध्यक्ष मनिषासिंह थारुले विनियोजन विधेयक र आर्थिक विधेयक प्रस्तुत गरेकी थिइन् । उनले ८८ करोड ३१ लाख ४८ हजारको बजेट गाउँसभामा पेश गरेकी थिइन् ।
असार १० गते एमालेका जनप्रतिनिधिहरुले गाउँसभा बहिष्कार गरेपछि गणपूरक संख्या नपुगेको कारण बैठक स्थगित भएको थियो । दोस्रो वैठक १४ गते बसेको थियो । ११ औं गाउँसभाबाट न्यायिक समिति पनि गठन भएको छ ।
उपाध्यक्ष संयोजक रहने न्यायिक समितिमा दुई जना सदस्य गाउँसभाबाट चुनिएका हुन् । बहुमतका आधारमा न्यायिक समिति सदस्यमा शेरबहादुर विक र सुशिला विक चयन भएका छन् ।