कञ्चनपुर : कञ्चनपुरमा एक युवकले बालिकामाथि दुर्व्यवहारपछि आत्महत्या गरेका छन् । मंगलवार भीमदत्त नगरपालिका–२ उल्टाखामका ३४ वर्षीय दिनेश मालीले आफ्नै घरको कोठामा झुन्डिएर आत्महत्या गरेको प्रहरीले जनाएको छ ।
उनले छिमेकी ११ वर्षीया बालिकामाथि दुव्र्यवहार गरेपछि आत्महत्या गरेको खुलेको जिल्ला प्रहरी कार्यालय कञ्चनपुरका डीएसपी चक्रबहादुर शाहले बताए ।
बालिकाको परिवारले भने जबरजस्ती करणीको प्रयास गरेको आशंका गरेको छ । बालिकाका बुवाले युवकले बालिकालाई पसलबाट कोठामा लगेर कुटपिट गरेको आरोप लगाएका छन् । ‘सामान किन्न गएकी छोरलाई पसलबाट हात समातेर जबरजस्ती घरमा लगेर कुटपिट गरिएको छ । कोठा भित्र लगेर आक्रमण भयो। यसमा शंका छ’ उनले भने ।
बालिकाको दुवै आँखा र घाँटीमा चोट लागेको छ । उनको कैलालीको धनगढीस्थित माया मेट्रो अस्पतालमा उपचार भइरहेको परिवारले जनाएको छ ।
