नेपालगञ्ज : बर्दियामा बाघको आक्रमणबाट फेरि एक महिलाको मृत्यु भएको छ । बर्दियाको ठाकुरबाबा नगरपालिका वडा नम्बर ४ सैनवारकी ४१ वर्षीया लिली चौधरीको गएराती बाघको आक्रमणबाट मृत्यु भएको हो ।
बर्दिया राष्ट्रिय निकुञ्जका प्रमुख संरक्षण अधिकृत विष्णुप्रसाद श्रेष्ठका अनुसार बाहिर निस्केको समयमा राती सवा ८ बजेतिर बाघले लिलीलाई झम्टिएर गम्भीर घाइते बनाएको थियो ।
घाइते चौधरीको उपचारका लागि भुरीगाउँ लैजाँदै गर्दा बाटोमै मृत्यु भएको श्रेष्ठले बताए । केही समय यता बाँके र बर्दिया राष्ट्रिय निकुञ्जका मध्यवर्ती क्षेत्रमा बाघले लगालग मानिसमाथि आक्रमण गर्न थालेपछि स्थानीय त्रसित बनेका छन् ।
