नेपालगञ्ज : अन्तरजातीय विवाह गरेर मंसिर २९ गतेदेखि सम्पर्कविहिन हुम्लाका चन्द्रे कामी भेटिएका छन् । उनको खोजीमा गएको प्रहरीले खार्पुनाथ गाउँपालिकामा फेला पारेको हो ।
उनको खोजीका लागि ठूलो संख्यामा प्रहरी परिचालन गरिएको थियो । बुधबार बिहान ८ बजे हिँडिरहेको अवस्थामा चन्द्रेलाई फेला पारिएको हुम्ला प्रहरीले जनाएको छ ।
प्रहरी निरीक्षक दानसिंह भण्डारीका अनुसार डीएसपी हेरम्ब शर्माको टोलीले उनलाई सदरमुकाम ल्याइँदैछ । ‘हाम्रो डिएसपी सापको टोलीले उनलाई खार्पुनाथमा सामान्य अवस्थामा फेला पारेको छ,’ भण्डारीले भने, ‘अब सदरमुकाम ल्याउँदैछौं । थप विवरण बुझ्न एक दुई घण्टा कुर्नुपर्ने हुन्छ ।’
हुम्लाको सर्केगाड गाउँपालिका–१ जैर गाउँका चन्द्रेले मंसिर ५ मा मुगुको सोरु गाउँपालिका–४ की रमिला मल्ल (सुन्तली)लाई भगाएपछि रमिलाका माइती पक्षले २९ गते राती खोसेर लिएका थिए ।
उनीहरुले त्यसै दिन चन्द्रेलाई समेत लगेको जैरका गाउलेहरुले बताएका थिए। त्यसै दिनदेखि सम्पर्कविहिन उनलाई खोज्न आफै निस्किएका डिएसपी हेरम्ब शर्माको टोलीले भेटेको हो ।
सुन्तली र उनका बुवा प्रहरीको निगरानीमै छन् भने चन्द्रेको परिवार गाउँलेले उनलाई सुन्तलीका माइती पक्षले सँगै लिएको दाबी गरिरहेका थिए । केटीको परिवारले भने आफूहरुले छोरी मात्र ल्याएको बताएका थिए ।
