सुर्खेत : सुर्खेत प्रहरीले लागू औषध ब्राउनसुगरसहित एक जनालाई नियन्त्रणमा लिएको छ । विशेष सूचनाको आधारमा कर्णाली प्रदेश प्रहरी ब्युरो र जिल्ला प्रहरी कार्यालय सुर्खेतको संयुक्त टोलीले एक जनालाई नियन्त्रणमा लिएको हो ।
वीरेन्द्रनगर नगरपालिका–२ भुरेलीबाट २८ वर्षीय खीमबहादुर बुढालाई नियन्त्रणमा लिएको सुर्खेत प्रहरीले जानकारी दिएको छ । नियन्त्रणमा लिईएका व्यक्ति वीरेन्द्रनगर कोलडाँडाका रहेको प्रहरीले जनाएको छ ।
ज्याकेटको दाहिने खल्तीमा कागज भित्र ८० मिलिग्राम लागू औषध ब्राउनसुगर जस्तो देखिने धुलो पदार्थ र पाईन्टको खल्तीमा १२ हजार ४५० बरामद भएको जिल्ला प्रहरी कार्यालय सुर्खेतका प्रवक्ता रामप्रसाद घर्तीले जानकारी दिए । उनका अनुसार घर खानतलासी गर्दा प्रहरीले ८ ग्राम ७३० मिलिग्राम ब्राउनसुगर भेटिएको छ । यसबारे थप अनुसन्धान भइरहेको प्रहरीले जनाएको छ ।
