नेपालगञ्ज : बाँकेमा उपचाररत थप चार जना कोरोना संक्रमितको मृत्यु भएको छ । मृत्यु हुनेहरुमा तीन जना महिला र एक पुरुष रहेका छन् ।
भेरी अस्पतालमा उपचाररत दंगीशरण गाउँपालिका १ दाङकी ३७ बर्षीया महिलाको मृत्यु भएको जिल्ला कोभिड १९ संकट ब्यबस्थापन केन्द्र बाँकेका फोकल पर्सन तेज ओलीले जानकारी दिए ।
त्यस्तै कोरोनाबाट मृत्यु हुनेमा अन्य तीन जना बर्दिया जिल्लाका रहेका छन् । ओलीका अनुसार मृत्यु हुनेमा बारबर्दिया ११ बर्दियाकी ४२ बर्षीया महिला, राजापुर नगरपालिका ४ की ५२ बर्षीया महिला र राजापुर नगरपालिका ८ का ३५ बर्षीय पुरुषको मृत्यु भएको हो ।
मृतकहरु सबैको केही घण्टाको फरकमा मृत्यु भएको ओलीले जानकारी दिएका छन् । यो संगै बाँके जिल्लामा कोरोनाबाट मृत्युु हुनेको संख्या ३३५ र बाहिरी जिल्लाका मृतकको संख्या ४२३ पुगेको छ ।
