नेपालगञ्ज : बाँकेको कोहलपुरबाट मोटरसाइकल चोरीमा संलग्न तीन जनालाई प्रहरीले पक्राउ गरेको छ । रुकुम पश्चिमको चौरजहारी नगरपालिका–११ का १८ वर्षीय अनुप चन्द, २० वर्षीय सुन्दर मल्ल र १८ वर्षीय अम्मर बिकलाई बिहीवार विहान पौने तीन बजेतिर पक्राउ गरिएको कोहलपुरका डिएसपी रविन्द्र खनालले जानकारी दिए ।
कोहलपुर नगरपालिका–११ स्थित बसपार्कको पूर्वतर्फको सडकबाट चोरीको भे.३.प ६००४ नम्वरको डिस्कभर मोटरसाईकल सहित उनीहरु पक्राउ परेका हुन् । उक्त मोटरसाइकल चोरी भएको भन्दै पीडितले दिएको उजुरीका आधारमा प्रहरीले खोजी गर्दै जानेक्रममा उनीहरु प्रहरीको फन्दामा परेको डिएसपी खनालको भनाइ छ ।
पक्राउ परेकाको साथबाट विभिन्न मोटरसाइकलका पाटपुर्जा समेत बरामद गरिएको प्रहरीले जनाएको छ । केही दिनदेखि कोहलपुरमा मोटरसाइकल चोरीका घटना बढेका छन् ।
