नेपालगञ्ज : नेपाल–भारत सीमा क्षेत्र गत चैत्र ११ गतेदेखि आवगमनमा कडाई गर्ने स्थानीय प्रशासनको निर्णय भए पनि कडाईका साथ लागू गर्न नसक्दा नेपालगञ्जमा कोरोना संक्रमण समुदाय स्तरमा पुगेको पाईएको छ ।
भारतमा तीब्र गतिमा कोराना संक्रमण फैलिएपछि स्थानीय कोभिड–१९ संकट व्यवस्थापन समितिले अत्यावश्यक बाहेक अन्य कार्यको लागि सीमा क्षेत्रमा आवागमनमा रोक लगाउने निर्णय गरे पनि कार्यान्वयन फितलो छ ।
भारतबाट नेपाल आउनेलाई लक्षित गरी सीमा क्षेत्रमा नेपालगञ्ज उपमहानगरले हेल्थ डेस्क स्थापना गरे पनि दैनिक खरिददारी गर्न जानेका लागि भने खासै ध्यान पुराउन सकिएको छैन ।
कोरोना महामारी बढ्दै गर्दा राजनैतिक दलका गतिविधि, मेला, पर्व तथा विद्यालय र कलेज सञ्चालन गर्दा स्वास्थ्य प्रोटोकल मापन भए नभएको अनुगमन फितलो हुँदा समस्या थपिएको हो ।
