नेपालगञ्ज : बाहिरी जिल्लाबाट आएर बाँकेमा उपचार गराइ रहेका थप दुईजना कोरोना संक्रमितको मृत्यु भएको छ । नेपालगञ्ज मेडिकल कलेज शिक्षण अस्पताल कोहलपुरमा उपचारका क्रममा दाङका दुई जना कोरोना संक्रमित पुरुषको शनिवार राती मृत्यु भएको हो ।
घोराही उपनहानगरपालिका वडा नम्बर ९, बनगाउँ दाङका ६७ बर्षीय कोरोना संक्रमित एक पुरुषको उपचारका क्रममा नेपालगञ्ज मेडिकल कलेज शिक्षण अस्पताल कोहलपुरमा शनिवार राती ११ बजरे ५० मिनटमा मृत्यु भएको जिल्ला कोभिड १९ संकट व्यवस्थापन केन्द्रका फोकल पर्सन नरेश श्रेष्ठले जानकारी दिए ।
यस्तै नेपालगञ्ज मेडिकल कलेज शिक्षण अस्पताल कोहलपुरमै उपचारका क्रममा दाङका अर्का एक संक्रमित पुरुषको मृत्यु भएको छ । तुलसीपुर उपमहानगरपालिका वडा नम्बर ९, बेलुवाका ६८ बर्षीय पुरुषको उपचारका क्रममा शनिवार राती १ बजेर ४० मिनटमा मृत्यु भएको हो ।
योसँगै जिल्ला बाहिरबाट बाँकेमा कोरोनाको उपचार गराउन आई मृत्यु हुनेको संख्या ४६ पुगेको छ ।
