नेपालगञ्ज : ३० औं अन्तर्राष्ट्रिय जेष्ठ नागरिक दिवस बाँकेमा पनि मनाइएको छ । दिवसका अवसरमा नेपालगञ्ज उपमहानगरपालिका वडा नं. १३ को जेष्ठ नागरिक समाज तथा मिलन केन्द्रले सोही वडाका दुई जना जेष्ठ नागरिकलाई सम्मान गरेको छ ।
यसरी सम्मानित हुनेहरुमा नेपाली सेनाका पूर्व सुबेदार ९६ बर्षिय बलबहादुर खड्का र समाजसेवी ८६ बर्षिया सुशीला गौतम रहेका छन् । उनीहरुलाई केन्द्रले बिहीबार उनीहरुको घरघरमा गएर सम्मान गरेको हो ।
नेपालगञ्ज उपमहानगरपालिकाको सहयोगमा उनीहरुलाई सम्मान गरिएको सोही वडाका वडा अध्यक्ष बीरेन्द्रबहादुर शाहले जानकारी दिए । छुट्टाछुट्टै गरिएको सम्मान कार्यक्रममा केन्द्रका अध्यक्ष विष्णु सुवेदीले दोसल्ला र कदरपत्र प्रदान गरि सम्मान गरेका थिए ।
त्यस अवसरमा सम्मानित हुनेले पुरानो पुस्तालाई सम्झने परिपाटीले नै समाजलाई नैतिकवान र चरित्रवान बनाउन मद्दत पुग्ने विश्वास व्यक्त गरे ।
