नेपालगञ्ज : बाँकेबाट बिहीवार १९ जना कोरोना जितेर घर फर्केका छन् । स्वास्थ्य कार्यालय बाँकेका फोकल पर्सन नरेश श्रेष्ठका अनुसार नेपालगञ्ज उपमहानगरपालिकाका स्वास्थ्य शाखा प्रमुख रामबहादुर चन्द, भेरी यातायात प्रालिका अध्यक्ष राजेन्द्र गिरी, जिल्ला प्रहरी कार्यालय बाँकेमा कार्यरत दुई प्रहरी जवानलगायत ४ महिला र १५ पुरुष गरी १९ कोरोनामुक्त भई घर फर्केका हुन् ।
श्रेष्ठका अनुसार उनिहरुलाई भदौ २५ गते कोरोना संक्रमण देखिएपछि विभिन्न आइसोलेशनमा राखिएको थियो । योसँगै बाँकेमा कोरोना संक्रमणबाट निको हुनेको संख्या १ हजार ३ सय ५६ पुगेको छ ।
श्रेष्ठका अनुसार विभिन्न आइसोलेशन केन्द्रमा अन्य जिल्लाका ५ जना गरी ३ सय ४० जना संक्रमित उपचाररत छन् । बाँके जिल्लामा हालसम्म कोरोनाबाट संक्रमितको संख्या १ हजार ७ सय २ रहेको छ भने ११ जनाको मृत्यु भईसकेको छ ।
