नेपालगञ्ज : बाँके प्रहरीले ठूलो परिमाणमा लागुऔषध अफिमसहित दुईजनालाई पक्राउ गरेको छ । प्रहरीले दाङका २४ बर्षीय बसन्त घर्ती र रुकुमपूर्वका ५३ बर्षीय धनबहादुर सेनलाई अफिमसहित पक्राउ गरेको हो ।
जिल्ला प्रहरी कार्यालय बाँकेले सोमवार पत्रकार सम्मेलनमार्फत दुबै जनालाई सार्वजनिक गरेको हो । उनीहरुको साथबाट १० किलो लागुऔषध अफिम बरामद गरिएको प्रहरी उपरीक्षक ओम रानाले जानकारी दिए ।
वडा प्रहरी कार्यालयका इञ्चार्ज प्रहरी निरीक्षक हरि बस्नेत नेतृत्वको टोलीले उनीहरुलाई बाँकेको कुसुमबाट पक्राउ गरेको हो । उनीहरु लामो समयदेखि लागुऔषध कारोवारमा संलग्न रहेको अनुसन्धानबाट खुलेको प्रहरी उपरीक्षक रानाले बताए । उनीहरुमाथि थप अनुसन्धान थालिएको प्रहरीले जनाएको छ ।
