डुडुवा (बाँके) : बाँकेको डुडुवामा खबरदारी गर्न गठित संघर्ष समितिले गाउँपालिकासँग सुचना मागेको छ । गाउँपालिकामा सूचना अधिकारी को भन्ने यकिन नभएपछि सूचना माग गर्न गएको डुडुवा संघर्ष समिति केहीबेर अलमलमा परेको थियो ।
समितिका संयोजक तथा डुडुवा–६ का वडाध्यक्ष मोहनराम मिश्र कडाईका साथ प्रस्तुत भएपछि बताइएका सूचना अधिकारी संजयकुमार कर्णलाई सूचना मागको निवेदन बुझाइएको हो ।
नेपालको संबिधान २०७२ को धारा २७ तथा सूचनाको हक सम्बन्धीको ऐन २०६४ को दफा ३ अनुसार चार बुँदे निवेदनमार्फत गाउँपालिकासंग सूचना माग गरिएको संघर्ष समितिका प्रेस संयोजक सूर्यलाल यादवले जानकारी दिए । राष्ट्रिय सूचना आयोग र जिल्ला प्रशासन कार्यालय बाँकेलाई सूचना मागको बोधार्थ दिइएको उनले बताए ।
तर सूचना माग गरेपछि गाउँपालिका अध्यक्ष नरेन्द्र चौधरीले कुन कानून, कुन नियमअनुसार सूचना माग गएिको भन्दै समितिका सदस्यलाई हप्काउँदै अपशब्दसमेत बोलेको समितिका सदस्य राजेन्द्र बिकले बताए ।
निवेदनमार्फत गाउँपालिकामा रहेका निजामति, करार, ज्यालादारी वा अन्यको नाम, पद तथा तलब स्केलको विवरण, आर्थिक वर्ष २०७६/०७७ मा खर्च विकास बजेट र कुन कार्य, कति रकम, कहाँ खर्च भएको, उक्त कार्यका जिम्मेवार व्यक्तिको नाम (उपभोक्ता समिति) समेतको विवरण, आर्थिक वर्ष २०७४/०७५, आर्थिक वर्ष २०७५/०७६ र आर्थिक वर्ष २०७६/०७७ को लेखा परीक्षण प्रतिवेदन र गाउँपालिमा भएका सवारी साधान, प्रयोग गर्ने व्यक्ति, उक्त सवारी साधानमा गत वर्ष खर्च भएको इन्धन विवरण तथा मर्मतमा खर्च रकमको विवरण माग गरिएको छ ।
साथै निवेदन किन दर्ता गरिएको भन्दै सूचना अधिकारी भनिएका कर्णलाई समेत अध्यक्ष चौधरीले हप्काएको संघर्ष समितिले जनाएको छ ।
