सदरलाइनडटकम,
डुडुवा (बाँके) : बाँककोे डुडुवा गाउँपालिकामा स्तरिय स्वास्थ्य उपचार पद्धती सम्वन्धी साथी समुह दुई दिने तालिम सोमबार सम्पन्न भएको छ ।
गाउँपालिका अन्र्तगत रहेका विभिन्न स्वास्थ्य संस्थाहरुमा एउटै रोगमा एउटै औषधी र मात्रामा एकरुपता गर्ने उद्देश्यले तालिम आयोजना गरिएको हो ।
डुडुवा गाउँपालिका स्वास्थ्य शाखाले आयोजना गरेको सो तालिममा वडा एकदेखि ६ सम्म रहेका स्वास्थ्य चौकी इन्चार्ज र ओपिडीमा बस्ने स्वास्थ्यकर्मीहरुको सहभागिता रहेको तालिममा स्थानीय उपचार पद्धती अनुसार विरामीले स्वास्थ्य चौकीबाट उपचार पाएको छ, छैन ? चाहिने औषधी वितरण गरिएको छ, छैन ? रोग अनुसारको औषधी र त्यसको असर लगायतका बारेमा औषधी व्यवस्था विभागका फर्मासिष्ट डा. अशोक शर्माले सहजीकरण गरेका थिए ।
तालिमको समापन गर्दै गाउँपालिका अध्यक्ष नरेन्द्रकुमार चौधरीले गाउँपालिकाले उपलब्ध गराउने स्वास्थ्य उपचार सेवा पद्धतीमा एकरुपतामा जोड दिदै औषधी र मात्रामा कही कतै फरक गर्न नहुने बताए ।
उनले स्वास्थ्य सम्बेदनशिल क्षेत्र भएकाले गम्भीर भएर रोग अनुसारको औषधी र मात्रा दिन स्वास्थ्यकर्मीलाई अनुरोध गरे ।
कार्यक्रममा स्वास्थ्य कार्यालय बाँकेका प्रमुख धीरजंग शाह, गाउँपालिका प्रमुख प्रशासकिय अधिकृत प्रशुराम उपाध्याय, कार्यपालिका सदस्य लिलावती यादव र स्वास्थ्य शाखा प्रमुख धनबहादुर बुढा लगायतले आ–आफ्नो भनाई राखेका थिए ।
