कोरोनाबिरुद्धको अभियानका लागि नेपालगञ्ज उपमहानगरका शिक्षकको एकदिनको तलब

  
  प्रकाशित मितिः सोमवार, जेष्ठ २६, २०७७       | 385 Views   ||


सदरलाइनडटकम,
नेपालगञ्ज :  कोबिड–१९ नोबल कोरोना भाईरसको संक्रमण रोकथाम तथा व्यवस्थापनका लागि नेपालगञ्ज उपमहानगरलाई नेपाल शिक्षक महासंघ नगर समितिले झण्डै चार लाख रुपैयाँको आर्थिक सहयोग गरेको छ ।

नेपाल शिक्षक महासंघ नेपालगञ्ज नगर समितिको आव्हानमा नगर क्षेत्रका सम्पुर्ण शिक्षकहरुबाट उपलब्ध एकदिनको तलब बराबरको रकम संकलन गर्दै सोमबार एक कार्यक्रमबीच सो आर्थिक सहयोग हस्तान्तरण गरिएको हो ।

शिक्षक महासंघ नगर अध्यक्ष मनोजराजा श्रीवास्तवले नेपालगञ्ज उप–महानगरपालिकामा स्थापित ‘प्रकोप व्यवस्थापन कोष’मा दाखिला हुने गरि संकलित रकम ३ लाख ९५ हजार ८ सय ८८ रुपैयाको चेक नेपालगञ्ज नगर प्रमुख डा.धवलसम्शेर राणालाई हस्तान्तरण गरेका छन् ।

चेक ग्रहण गर्दै नगर प्रमुख राणाले कोरोना संक्रमण व्यवस्थापनका लागि शिक्षक महासंघको सहयोगी भुमिका प्रति आभार प्रकट गर्दै यो रकमले संक्रमण व्यवस्थापन कार्यमा ठूलो मद्दत पुग्ने बताए ।

कार्यक्रममा नेपाल शिक्षक महासंघका केन्द्रीय सदस्य द्रोण वलीले केन्द्रीय समितिको सोचलाई आत्मसाथ गर्दै नगर शिक्षक महासंघमार्फत भएको संकलन कार्य नमुना भएको बताए ।

नेपाली शिक्षकहरु हरेक परिस्थितिमा हातेमालो गर्दै आएको स्मरण गर्दै केन्द्रीय सदस्य वलीले स्थानीय तहबाट शिक्षकका यथासक्य समस्या समाधानका लागि पनि आग्रह गरे ।
नगर अध्यक्ष मनोजराजा श्रीवास्तवको सभापतित्वमा सम्पन्न सो कार्यक्रममा नेपालगञ्ज उप–महानगरपालिका उप प्रमुख उमा थापा मगरलगायतले मन्तव्य राखेका थिए ।

सो अवसरमा नगर शिक्षा शाखा प्रमुख गोर्खबहादुर थापा, नेपाल शिक्षक संघ बाँकेका अध्यक्ष वीरेन्द्र यादव ,नेपाल राष्ट्रिय शिक्षक संगठन बाँकेका अध्यक्ष बामदेव सुवेदीसहित विभिन्न पेशागत संस्थाहरुका अध्यक्ष, प्रतिनिधि तथा विद्यालयका प्रधानाध्यापकहरुको उपस्थिति रहेको कार्यक्रममा नगर सचिव केशवराज शर्माले संचालन र स्वागत कंचन आचार्यले गरेकी थिईन ।

प्रकाशित मितिः सोमवार, जेष्ठ २६, २०७७     6:33:41 PM  |