सदरलाइनडटकम,
काठमाण्डौ : काठमाण्डौंबाट नेपालगञ्ज उड्ने तयारीमा रहेको श्री एयरलाइन्सको हवाई जहाजमा ‘गम्भीर समस्या’ आएको भन्दै अन्तिम समयमा उड्नबाट रोकिएको छ ।
शनिबार बिहान साढे आठ बजे सो हवाई जहाज नेपालगञ्ज उड्ने तयारीमा रहेको बेलामा जाहाजका एयर होस्टेसहरुले हवाई जहाजमा बसिसकेका यात्रुहरुलाई हतार–हतार विमानबाट ओरालेका छन् ।
‘इन्जिन स्टार्ट गरेर पाइलटले विमानस्थल टावरबाट उड्ने अनुमतिसमेत लिइसकेका थिए । तर, एक्कासी एयर होस्टेजहरुले सिरियस प्रोबलम आयो छिटोछिटो ओर्लिनुस् भनेर हामीलाई ओराले,’ एक जना यात्रुले भने ।
कस्तो खालको प्राविधिक समस्या हो भन्नेबारे जानकारी भने दिइएको छैन । श्री एयरलाइन्सका महाप्रवन्धक अनिल मानन्धरले प्राविधिक समस्या आएर उडान रोकिएको र मर्मतको काम भइरहेको जानकारी दिए ।
उनले पनि केमा समस्या आएको हो भनेर खुलाउन चाहेनन् । मानन्धरले भने, ‘सुरक्षालाई त ध्यान दिनुर्पयो नि । त्यही भएर केहीबेर डिले भएको छ ।’ अनलाइनखबरबाट
