सदरलाइनडटकम,
नेपालगञ्ज डेस्क : छुट्टाछुट्टै दुर्घटनामा परी चार जनाको मृत्यु भएको छ । भैरहवामा तीन वटा ट्रक एकआपसमा ठोक्किँदा तीन जनाको मृत्यु भएको छ भने टिप्परको ठक्करबाट सुर्खेतमा एक जनाको ज्यान गएको छ ।
भैरहवाबाट परासीका लागि छुटेको लु १ ख ६७४५ नम्बरको ट्रक, परासीबाट भैरहवातर्फ जाँदै गरेको ना २ ख ८४८१ र ना ५ ख ७८५६ नम्बरको ट्रक एकआपसमा ठोक्किँदा नवलपरासीको पालिनन्द गाउँपालिका ४ का लालु कुर्मी र भविकन कुर्मी तथा सुनसरीको चतराका पूर्णबहादुर भुजेलको मृत्यु भएको रुपन्देहीका प्रहरी नायब उपरीक्षक खड्कबहादुर खत्रीले जानकारी दिए । बिहान बाक्लो कुहिरो लागेका कारण दुर्घटना भएको हुनसक्ने प्रहरीले अनुमान गरेको छ ।
यस्तै सुुर्खेतको वीरेन्द्रनगरमा टिप्परले मोटरसाइकललाई ठक्कर दिँदा एक जनाको मृत्यु भएको छ । मंगलवार बिहान टिप्परले ठक्कर दिँदा कालिकोट महावै गाउँपालिका ३ का २० वर्षीय केशर सिंहको मृत्यु भएको हो ।
सिंह सवार भे १ प २१७८ नम्बरको मोटरसाइकललाई भे १ ख २२४२ नम्बरको टिप्परले ठक्कर दिएको थियो । सिंहलाई टिप्परले किचेर झण्डै २० मिटरसम्म घिसारेको प्रत्यक्षदर्शीले बताएका छन् । जिल्ला प्रहरी कार्यालयका प्रहरी नायब उपरीक्षक रवि रावलले टिप्पर र चालकलाई नियन्त्रणमा लिएको जानकारी दिए ।
