सदरलाइनडटकम,
दाङ : भारतले नेपाली भूमी मिचेको बिरोधमा घोराहीका विद्यार्थीहरुले प्रदर्शन गरेका छन् । दार्चुलाको लिपुलेक, कालापानी, लिम्पियाधुरा लगाएतका क्षेत्र नेपाली भूमी भएको भन्दै तत्काल फिर्ता गर्न माग गर्दै विद्यार्थीहरुले प्रदर्शन गरेका हुन् ।
घोराहीमा रहेका आधा दर्जन विद्यालयका विद्यार्थीहरुले प्रर्दशन गर्दै भारतीय हस्तक्षेपबिरुद्ध सबैलाई एक जुट हुन आह्वानसमेत गरेका छन् । विद्यार्थीहरुले भारतीय हस्तक्षेप बन्द गर, नेपाली भूमी फिर्ता गर, लिपुलेक हाम्रै हो भन्ने नारा लगाउँदै बजार परिक्रमा गरेका हुन् । माध्मिक विद्यालय रझेना, गोरखा मावि, पद्मोदय नमूना माबि, दाङ भ्याली कलेज र बाल विकास माविका विद्यार्थीहरु प्रदर्शनमा उत्रिएका हुन् ।
नेपाली झण्डा र विद्यार्थी संगठनहरुका झण्डा लिएर सडकमा उत्रिएका बिद्यार्थीहरुले नेपाली भूमी फिर्ता ल्याउन सरकारको ध्यानाकर्षणसमेत गराएका छन् । करीब ५ सय बढी विद्यार्थीहरुले घोराही बजारसहित जिल्ला प्रशासन कार्यालय र काठेकोहल क्षेत्रमा प्रदर्शन गर्दै नाराबाजी गरेका हुन् ।
यसैविच नेत्रबिक्रम चन्द विप्लव समुहको विद्यार्थी संगठन अखिल क्रान्तिकारीका दाङ जिल्ला अध्यक्ष अनिल केसीलाई प्रहरीले पक्राउ गरेको छ । भारतिय हस्तक्षेपविरुद्धको प्रदर्शनमा सहभागी केसीलाई प्रहरीले नियन्त्रणमा लिएको हो । सरकारले विप्लव समुहलाई प्रतिबन्ध लगाएपछि सो समुहमा आस्था राख्ने व्यक्तिलाई प्रहरीले नियन्त्रणमा लिँदै आएको छ ।
भारतीय हस्तक्षेपविरुद्ध विद्यार्थीहरु सडकमा
१२ मंसिर २०७६, बिहीबार १५:५२
