बाघको आक्रमणमा परेर महिलाको मृत्यु

  
  प्रकाशित मितिः आइतवार, कार्तिक २४, २०७६       | 251 Views   ||

सदरलाइनडटकम,
कोहलपुर (बाँके) : दाउरा लिन जंगल गएकी एक महिलाको बाँकेमा पाटेबाघको आक्रमणमा परेर ज्यान गएको छ । ईलाका प्रहरी कार्यालय कोहलपुरले दिएको जानकारी अनुसार सो घटनामा परी कोहलपुर नगरपालिका–१३ नयाँबस्तीकी ६५ वर्षिया काली बस्नेतको पाटेबाघको आक्रमणमा परेर ज्यान गएको हो ।
इलाका प्रहरी कार्यालय कोहलपुरका ईन्चार्ज प्रहरी नायव उपरीक्षक हेमबहादुर शाहीका अनुसार आइतबार अपरान्ह ४ बजेतिर बाँके राष्ट्रिय निकुञ्ज अन्तरगतको मध्यवर्ती क्षेत्रमा पर्ने ‘परेवा बस्ने ढिक’ भन्ने स्थानमा दाउरा लिन गएकी बस्नेतलाई पाटेबाघले आक्रमण गरेको थियो ।
दाउरा लिन गएकी बस्नेत घर नफर्किएपछि खोज्न जाँदा पाटेबाघको आक्रमण परेर मृत भेटिएको स्थानीयबासीले भेटाएपछि प्रहरीलाई खबर गरेका थिए ।
पछिल्लो समय बाँके र बर्दिया जिल्लामा पाटेबाघको आक्रमण बढेको छ । यसअघि २०७५ माघ यता पाटेबाघको आक्रमणमा परेर बाँके र बर्दियामा चार जनाको मृत्यु भइसकेको छ ।
बाघको आक्रमण बढेसँगै बाँके र बर्दिया निकुञ्जका मध्यवर्ती क्षेत्रसँगै आसपास गाउँका बासिन्दा त्रसित बनेका छन् । बाँके र बर्दिया राष्ट्रिय निकुञ्जमा बाघको संख्या बृद्धि भएसँगै निकुञ्जमा आहाराको कमी भएपछि मध्यवर्ती क्षेत्र हुँदै मानव बस्तीतर्फ पस्न थालेको बताइन्छ ।
बाँके राष्ट्रिय निकुञ्ज पाटेबाघको संरक्षणको लागि स्थापना गरिएको सबैभन्दा कान्छो निकुञ्ज हो । पछिल्लो तथ्याङ्क अनुसार बाँके राष्ट्रिय निकुञ्जमा २१ वटा बयस्क बाघ रहेका छन् ।

प्रकाशित मितिः आइतवार, कार्तिक २४, २०७६     7:15:05 PM  |