भारतीय मुद्रण उद्योगीको टोली नेपालगञ्जमा

  
  प्रकाशित मितिः मङ्लबार, कार्तिक १९, २०७६       | 143 Views   ||

सदरलाइनडटकम,
नेपालगञ्ज : भारतीय मुद्रण उद्योग व्यवसायीहरुको टोली नेपाल भ्रमणका क्रममा नेपालगञ्ज पुगेको छ । नेपाल मुद्रण उद्योग संघ बाँकेको संयोजन तथा नेपाल मुद्रण उद्योग महासंघकी केन्द्रीय सदस्य मीना सुवेदी ढकालको अग्रसरतामा उक्त टोलीलाई नेपालगञ्जमा भव्य स्वागत गरिएको छ ।
नेपाल मुद्रण उद्योग महासंघका केन्द्रीय तथा अल इण्डिया फेडेरेशन अफ माष्टर प्रिन्टर्सका पूर्व अध्यक्ष एवं पामेक्सका अध्यक्ष प्रोफेसर कमल चोपराको नेतृत्वमा धनगढीबाट काठमाण्डौ जान लागेको टोली यात्राका क्रममा नेपालगञ्ज पुगेको महासंघका केन्द्रीय सदस्य ढकालले बताइन् ।
उक्त अवसरमा प्रोफेसर चोपराले भारतको मुम्बईमा सन् २०२० जनवरी ६ देखि शुरु हुने अन्तर्राष्ट्रिय प्रिण्टिङ मेला तथा एलाइड मेशिनरी इण्डष्ट्रीजको प्रदर्शनीको प्रवद्र्धन र प्रचारप्रसार गर्ने उद्देश्यले नेपाल भ्रमणमा आएको जानकारी दिए ।
महासंघकी केन्द्रीय सदस्य ढकालले उक्त प्रदर्शनीमा सहभागी भएर व्यावसायिक फाइदा उठाउन नेपालका मुद्रण व्यवसायीहरुलाई आग्रह गरिन् । कार्यक्रममा ढकाल र नेपाल मुद्रण उद्योग संघकी अध्यक्ष कुसुम बस्नेतले भारतीय टोलीलाई खादा ओढाएर स्वागत गरेका थिए ।
सो अवसरमा महासंघका केन्द्रीय सदस्य तपेन्द्र विक्रम शाह, महासंघका पूर्व केन्द्रीय उपाध्यक्ष मेघराज ओली, संघका वरिष्ठ सदस्य पूर्णलाल चुकेलगायत बाँकेका करीब दुई दर्जन मुद्रण व्यवसायीहरुको सहभागिता थियो ।

प्रकाशित मितिः मङ्लबार, कार्तिक १९, २०७६     5:55:15 PM  |