सदरलाइनडटकम,
बर्दिया : लागुऔषध ब्राउन सुगर (खैरो हेरोइन) तस्करी गर्ने एक जना भारतीय नागरिकलाई बर्दिया प्रहरीले पक्राउ गरेको छ । नेपाल भारत सीमाना निसानगाढा नजिकै मधुवन नगरपालिका ७ बाट भारतको उत्तरप्रदेश, जिल्ला बहराइच थाना मोतिपुर, मिहिपुरवा गाउँका २५ वर्षीय बिमलेशकुमार हरिजनलाई ३० ग्राम ब्राउन सुगरसहित पक्राउ गरिएको जिल्ला प्रहरी कार्यालय बर्दियाका प्रहरी उपरीक्षक सुरेन्द्रप्रसाद मैनालीले बताए ।
ब्राउन सुगरसहित मंगलवार दिउँसो पक्राउ परेका हरिजनलाई प्रहरीले बुधवार पत्रकार सम्मेलनमार्फत सार्वजनिक गरेको हो । प्रहरी उपरीक्षक मैनालीका अनुसार शंकास्पद अवस्थामा हिँडिरहेका हरिजनको साथबाट बरामद गरिएको लागुऔषध २ लाख मूल्य बराबरको रहेको छ ।
पक्राउ परेका भारतीय नागरिक बिमलेश कुमार हरजन झण्डै ४ वर्ष अघिदेखि नेपालमा आएर ब्राउन सुगर कारोबारमा संलग्न रहेको बुझिएकोले घटनाबारे थप अनुसन्धान भइरहेको प्रहरीले जनाएको छ ।
ब्राउन सुगरसहित भारतीय नागरिक पक्राउ
१९ मंसिर २०७५, बुधबार १५:२७
