सदरलाइनडटकम,
काठमाण्डौ : आफ्नै शिशुको हत्या आरोपमा नुवाकोट प्रहरीले सूर्यगढी गाँउपालिका–१ लच्याङकी सम्झना तामाङलाई पक्राउ गरेको छ । शिशु जन्माएर हत्या गरेको अभियोगमा २२ वर्षीया तामाङलाई शनिवार नियन्त्रणमा लिइएको जिल्ला प्रहरी कार्यालयका प्रहरी निरीक्षक मुक्तिनाथ सापकोटाले बताए ।
श्रीमान वैदेशिक रोजगारमा गएको समयमा अवैध सम्बन्धबाट जन्मेको शिशुको तामाङले हत्या गरेको जानकारीको आधारमा उनलाई पक्राउ गरिएको प्रहरीले बताएको छ ।
शिशुको शव रहेको स्थानको घटनास्थल मुचुल्का, उनीसँगको प्रारम्भिक अनुसन्धान, घरपरिवार र स्थानीयवासीले दिएको सूचनाको आधारमा ज्यान मुद्दा अभियोगमा अनुसन्धान शुरु गरिएको प्रहरीले जनाएको छ ।
घटनामा संलग्न रहेका परपुरुषको समेत पहिचान भइसकेकोले उनलाई पक्राउ गर्न प्रहरी परिचालन गरिएको जिल्ला प्रहरी कार्यालयका प्रमुख वसन्त कुँवरले बताए ।
पक्राउ परेकी महिलाको श्रीमान् विजय तामाङ रोजगारीको सिलसिलामा २९ महिना साउदी बसेर एक महिनाअघिमात्र घर फर्किएका हुन् ।
अवैध सम्बन्धबाट जन्मिएको शिशुको हत्या आरोपमा आमा पक्राउ
७ आश्विन २०७५, आईतवार ११:०२
